Flutse - Bie de coiffeur

Flutse - Bie de coiffeur

Als joengetje gienk ik gèrn noa de coiffeur.  ’t Was nie ip rendez-vous lik nu moa der zoaten der altied een serieje te wachten in de reke.  Allemolle vinten die vele te verteln aan.

De coiffeur was bezig met hoar snien en ie luusterde met één ore noa wat dat da mannevolk te verteln had.  Als kiend was meeluustern de boodschap.

De coiffeur hoalde wel een ki een graptje uut voa djoengers te ploagn moar ip ’ t ende van ’t spil kregen we altied een spekke.  En da was nateurlik kerremesse.

De volgende, an wien ist nu ?  En een van die vinten zette hem in die stoel: vor hoar en board.  Allemolle dezelfste coupe en ipgeschoren in de nekke en ip doren.
Een klekke Petrol Han en de buk is vet. En ton begoste ’t gevoarlik werk: ‘t schèren.  ’t Schèèrmes wierd gewet ip een leren rieme die doar hangde te sliengeren.  Een potje zepe en een schèèrbustel en de vinten kregen allemolle een witte board lik Sint Nikloj.

Ot de coiffeur dichte kwam met zien scherp mes was ’t verschietachtig.  Het was juuste lik of dat ie die vinten gienk keeln lik een zwien.  Moa ’t kwam goed en ot ie gedoaen had een bitje alluun tegen ’t bloen en de vinten ulder kop bloenk lik een spegel.

Der woaren der vele die ulder mor ene ki in de weke schèèrden en vaneigens wast ton een groot verschil.

Voa djoengers wast allemolle een scharrekop.  Iedereen geliek.  A la brosse kort goed en goekoop.  Ojje noar gesneen was nog een bitje brillantine en vettig stiefsel omdat zoe rechte stoan.

De coiffeur had een witte schorte an.  ’t Was lik een dokteur.

Der woaren coiffeurs voa de vinten en voe de vrown (de wuven).

Van de vrown was ’t ip afsproake: snien, wasschen, een permanente of een mise en plies.

Tussendeure stoaken de vrown ook zelve krulspeln in ulder hoar.  Ze liepen ton een poar euren roend met die krulspeln en een foellardje drover.  Binstwille kost het drogen.

Loater kwamt de krultange en nog loater de droger en de handdroger.  Woar is de tied dat de vrown ulder hoar lieten creperen?  Dat hoar stoend rechte en ze liepen roend met een hooivumme ip ulder kop.  Da was ton de mode.

En de dag van vandoage loaten ze ulder hoar schildern in ’t groen, geel, blow of rood. Oewe dat gesneen wordt doa gommen nie van klappen.

De tieden zien veranderd en je kut da zien an ulder hoar. 

Goeste is koop hé.