Flutse - An de dop

Flutse - An de dop

Ik meugen kik mien drojn en keren woar dank wiln overal zien kik plakkatjes: Kelner gevraagd, afwasser gezocht, fijne collega’s gezocht, kom ons team aanvullen…

Fabrieken en klene middenstanders zoeken volk voa te werken.  Ojje één ziet pitten delven, leidiengen leggen of werken in weer en wiend ton ist een vrimden.  Chapeau want da zien der die wiln werken, die vorruut wiln in ’t leven…  en de Belgen ?  ze moeten ginne èn.

Oewe ist meugelik dat er de dag van vandoage nog doppers zien ?

Pas ip alle respect voa deze die malchanse in ulder leven get èn.  ’t Is zeker gin lachedienk ojje zoender werk gerakt an een zekere leeftied.  Ofgedankt, ziekte, faillissement… je moet moa meemoaken!

Woar is den tied van den dop?  Alle doagen mosten de menschen ulder anbieden vor een stempeltje ip ulder koarte.  Iedere dag ip een ander eure voa ’t zwart werk tegen te goan.

Da stempeltje da noemden ze een “dop”.

Ken ooit geweten dat er een joenk madamtje vroeg voa voaren te meugen want za nie vele gin tied, ze moest noar heur werk.  Ook da was doppen of in ’t schoon Vlams “stempelen”.

De dag van vandoage moeje nie mè gon doppen.  Je kriegt je geld automatisch.  In de reke goan stoan is nie mè sociaal, da mag nie mè gezien worden.

En wast er gin controlle???  Natuerlik, moe meestal ip klacht. Een zjaloezegoard die  nie koste verdroagen dat er een dopte.  Soms aat ie geliek …

De doppers kregen wel af en toe werk gepresenteerd moa da was zoender verplichtienge.  Alle uutvluchten wierden ipgeschreven.  En otter tonne één werk kreeg ton zat er meestal gin snee ip.  Otter iets gezeid wierd ton was ’t antwoord: ge peist toch nie dank me gon zot werken vor een poar duusd frank dank meer èn in de moand. Winnig mottivoatie.

Iedereen zoekt werkvolk.  Der zien der die ulder zoake moeten sluten omdazze gin volk vienden.  ’t Ergste is in de weekends.  Ze wiln allemolle thuus zien bie moeder.  Ze zoen allemolle en ki mee moeten goan ip zee.  Ze zoen zieder wel weten wat da werken is.  Verre van huus en gevoarlik werk.   De visscherieje trekt ook gin volk nie mè an.  ’t Is overal ’t zelfste liedje: lat me geruste.

Ip zee ist twee euren ip en twee euren in de mande… in weer en wiend.  ’t Bloed zoed in joen kele komn ojje ton hoort dat er zien die gin goeste èn voa te werken;  ’t moet al van ’t zelfs goan.  De gebroan kiekens moeten in ulder moend vliegen…